(مسكين صاحبنا.. إذا(صَبّن)ثيابه غيّمت..)* أصبح يخطط في(السّتر) يفحس يمينه بالشمال..! لي ماحسبها من زمن هذي رجوله هرولت.. قدصارمن بعد الظفر يحفرويبني فى الرِّمال..! راحت عليه اللي يظن أن الأماني أقبلت.. تجري وتسرع في الخُطَى لاجله وهو(خسِّ الرجال) قولوا ل(صاحبنا):انتبه.. هذي (العلايم) قدبدت واللي غرستُه أمس باتلقَى ثماره في (التِّفال)!! ×××× كل من غرس بذره أصيله صالحه قد أثمرت.. صارت حقيقه واضحه يا(صاحبي)ماهي خيال!! وانتَهْ فَقَهْ قولي وشف دنيا (المكاره)أدبرت راجع حسابك قبل ما تبسُط يمينك للسّؤال..!! المُلك له رب البشر إن شرّقت أوغرّبت والأمرفي يد الذي حاز(المهابه)و(الجلال).. ××××× (من قال شي خلّه يقول.. قدها معانا وانتهت)* ولعاد حاجه قولها للي رفع راسه ومال والأمربعد(الله) في يد(المعنّى)لي ثبت قابض بحبل(الحق)مادامت على الأرض الجبال!! هذي الرساله شِلّها.. يا(من)لسانه قدفلت والله يبعدنا مع(الصمصوم) من زَيْفِ الضَّلال…!!! *مأخوذ بتصرف من مثل(حضرمي) يقول : ((قدها فضيله على المسكين لاصبّن ثيابه غيّمت)) *من بيت شعري للشاعرالفقيد (سعيد فرج باحريز) يقول فيه: ((من قال شي خله يقول قدها معانا وانتهت ××× وعشاك تحتك باتشِله بالرضا أو بالصميل))